Plantun de Prouvènço

Pèr coumpara dos planto d'encò nostre

Thymus pulegioides & Plumbago europaea

Ferigouleto(-pichot-chaine)

Thymus pulegioides

Lamiaceae Labiaceae

Àutri noum : Farigouleto, Serpoulet, Badassoun, Menudet.

Noms en français : Thym faux pouliot, Serpolet petit-chêne.

Descripcioun :
Aquesto ferigouleto se retrobo dins li pelouso de mountagno mounte èi pas raro ; trachis pulèu sus sòu séusous. Jamai eisado à destria d'un biais segur, fau bèn regarda la cambo, carrado emé de péu sus li caire (e pas tout à l'entour o sus dous coustat). Apoundèn que la planto crèis d'un biais simpoudique, emé de ramo que parton dre tout de long de la tijo, e gaire acabado pèr un tros bèn rama. Pensa de coumpara emé lis àutri ferigouleto de mountagno.

Usanço :
La ferigouleto--pichot-chaine a à pau près li mémi prouprieta qu'aquéli de la ferigoulo estènt quand meme mens forto.

Port : Erbo
Taio : 3 à 30 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Thymus
Famiho : Lamiaceae
Famiho classico : Labiaceae

Ordre : Lamiales

Coulour de la flour : Roso
Petalo : irreguliero
Ø (o loungour) flour : 2 mm
Flourido : Printèms - Estiéu

Sòu : Si (Ca)
Autour basso e auto : 0 à 2400 m
Aparado : Noun
Mai à avoust

Liò : Tepiero seco - Pelouso
Estànci : Subremediterran à Subaupen
Couroulougi : Éurasiatico
Ref. sc. : Thymus pulegioides L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.